“Rəqabətə davamlı bazarda sahibkarların rolu ” və “Horizontal Müqavilə, Kartel və qeyri qanuni razılaşmalar ”  mövzusunda seminar keçiriləcək.

Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK), Milli Koordinasiya Bürosu və “Milli Koordinasiya Bürosuna dəstək və Tərəfdaşlıq və Əməkdaşlıq Müqavilələrinin yerinə yetirilməsi” Avropa Yardım Layihəsi ilə birlikdə 11 fevral 2010-cu il tarixdə, saat 10-da       “Rəqabətə davamlı bazarda sahibkarların rolu ” və “Horizontal Müqavilə, Kartel və qeyri qanuni razılaşmalar ”  mövzusunda seminar təşkil edir. Seminarı Xaricdən dəvət olunan yüksək ixtisaslı Beynəlxalq ekspertlər Massimiliano Qançi (Avropa Birliyinin təcrübəsini çatdırmaq üçün) və xanım Rəhimə Quliyeva (Yerli hüquqi aspektlərin öyrənilməsi üçün)  tərəfindən aparılacaq və Azərbaycan  dilinə tərcümə olunacaqdır.

Eyni zamanda seminarın keçirildiyi vaxt ərzində Azbarter təşkilatı tərəfindən barter əməliyyatları barədə maraqlı təqdimat olacaqdır.

Tədbir Bakı şəhəri, Həsən Əliyev küçəsi 57 ünvanında ASK-nın konfrans zalında keçiriləcəkdir.

ASK-sı ilə Azərbaycan Universiteti arasında Əməkdaşlıq müqaviləsi imzalanmışdır

29 yanvar 2010-cu il saat 15.00-da ASK-nın mərkəzi ofisində Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) ilə Azərbaycan Universiteti (AU) arasında Azərbaycan Respublikasında bizneslə təhsilin maraqlarının uzlaşdırılması, rəqabət qabiliyyətli milli kadrların yetişdirilməsi naminə yeni tərəfdaşlıq mühitinin formalaşdırılmasına töhfələr verməsi, müasir elmi-texniki nailiyyətlərin sahibkarlığımızın inkişafına yönəldilməsi, sahibkarlıq subyektlərinin maarifləndirilməsi, təkmilləşdirilməsi və inkişafına kömək göstərilməsi məqsədi ilə Əməkdaşlıq müqaviləsi imzalanmışdır.

Müqaviləni Sahibkarlar Təşkilatları Milli Konfederasiyası tərəfindən ASK-nın prezidenti cənab Məmməd Musayev, Azərbaycan Universiteti tərəfindən isə AU-nun rektoru, AMEA-nın müxbir üzvü, professor Akif Musayev imzalamışdırlar.

Rəsmi imzalanma mərasimindən sonra ASK prezidenti M. Musayev və AU rektoru A. Musayev mətbuat nümayəndəliyinin çoxsaylı suallarını cavablandırmışdırlar.

ASK-da  “Əməyin mühafizəsi “ mövzusunda

sahibkarlara seminar keçirilib
 

          Azərbaycan Respublikası Sahibkarlar (İşəgötürənlər) Təşkilatları Milli Konfederasiyası Almaniyanın Bildungswerk Der Wirtshaft təşkilatı ilə tərəfdaşlıq layihəsinə uyğun olaraq dekabrın 8-də ASK-nın konfrans zalında “Əməyin mühafizəsi “ mövzusunda birgə seminar keçirmişlər.

            Seminarda Almaniyadan bu sahə üzrə ekspert Zikfrid Helvit və layihənin koordinatoru Henri Zimmerman iştirak etmişlər. Ekspert Almaniyada “Əməyin mühafizəsi “ sahəsində toplanmış təcrübədən geniş söz açmışdır. Seminarda Əhalinin Sosial Müdafiəsi Nazirliyinin, Dövlət Əmək müfəttişliyinin, Azərbaycan Həmkarlar İttifaqları Konfederasiyasının məsul işçiləri, ASK-nın üzvü olan 15 şirkət və müəssisədən əməyin təhlükəsizlik məsələləri ilə məşğul olan 27 mütəxəssis və ASK-nın mütəxəssisləri iştirak etmişlər.

            Almaniyalı mütəxəssislər dekabrın 9-da Dövlət Əmək Müfəttişliyində görüşdə olacaq, tikinti materiallarının istehsalı və satışı ilə məşğul olan “Mətanət A” şirkətində və idxal-ixrac əməliyyatları ilə məşğul olan “Müller İnteryer “Məhdud Məsuliyyətli Müəssisəsində də yerli mütəxəssislərlə əməyin mühafizəsi ilə bağlı fikir mübadiləsi aparacaqlar.

Professor M.Qasımovun “Sahibkarlar üçün sanitariya  və gigiyena qaydaları” adlı kitabının təqdimatı

            Bu gün, Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) , respublikada gigiyena və sanitariya sahəsində tanınmış mütəxəssis, professor Maqsud Qasımovun Azərbaycan Respublikasının Səhiyyə Nazirliyi tərəfindən təsdiq olunmuş “Sahibkarlar üçün sanitariya və gigiyena qaydaları” adlı yeni kitabının  təqdimatı keçirildi.

            Azərbaycan Respublikası Səhiyyə Nazirliyinin Elmi-Tibbi şurası tərəfindən bəyənilərək Respublika Səhiyyə Nazirliyi tərəfindən təsdiq edilən metodik tövsiyə sahibkarların normal fəaliyyətinin təşkili üçün son dərəcədə vacib sənəddir və onlara töhfədir.

            Tədbirdə müəlliflərin əksəri, Nazirlər Kabinetinin, Azərbaycan Həmkarlar İttifaqı konfederasiyasının, Bakı şəhər icra hakimiyyətinin, əlaqədar nazirlik və baş idarələrin, dövlət və özəl səhiyyə təşkilatlarının nümayəndələri, Azərbaycan Sahibkarlar Konfederasiyasının üzvləri, mətbuat və televiziyanın habelə ictimaiyyətin nümayəndələri iştirak edirlər.

            Tədbirin belə geniş tərkibdə keçirilməsində məqsədimiz diqqəti ölkə əhalisinin sağlamlığının qorunmasında son dərəcədə əhəmiyyətli olan sanitar və gigiyena qaydalarına əməl olunmasının vacibliyinə yönəltməkdir.

            Metodik tövsiyənin yazılmasında məqsəd bilavasitə istehsalat və ticarətlə məşğul olan sahibkarlar, qeyri dövlət təşkilatları, şirkətlər və digərləri ilə Dövlət Sanitariya orqanları arasında əlaqələr yaratmaq və onları asanlaşdırmaqdan ibarətdir. Metodik tövsiyədə sanitariya qaydaları və tələblərinə, profilaktik dezinfeksiya məsələlərinə və bunlardan başqa qida sənayesi, ictimai iaşə, ərzaq ticarəti sahəsində, sanitariya-epidemik (profilaktik) tədbirlərin həyata keçirilməsində istehsalat nəzarəti qaydaları və onun üsullarına geniş yer verilmişdir. Kitabda olan materiallar sadə, əlverişli formada toplanılmışdır, əhalinin sanitariya epidemioloji salamatlığı haqqında olan mövcud qanunvericilik, normativ sənədlər, sanitariya gigiyena qaydalarında öz əksini tapmışdır. 
            Sanitariya sahəsində qanunvericiliklərin həyata keçirilməsi ilə maraqlanan sahibkarlar qeyri dövlət təşkilatları, idarə, müəssisə rəhbərləri, iş adamları, mütəxəssislər, fermer təsərrüfatları və sağlamlığına biganə olmayan hər kəs bu kitabdan istifadə edə bilər.

Əminik ki, “Sahibkarlar üçün sanitariya  və gigiyena qaydaları” stolüstü kitaba çevriləcək və ona sözsüz əməl olunacaqdır.

Şirkətlərdə işçilərlə səmərəli iş aparılması” mövzusunda seminar 

         Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) və Almaniyanın Bildungswerk Der Wirtshaft təşkilatı arasında imzalanmış Tərəfdaşlıq layihəsinə uyğun olaraq, Konfederasiyanın üzvü olan təşkilat rəhbərləri, onların kadr üzrə müavinləri və ya kadrlar şöbəsinin rəhbərləri, habelə həmkarlar təşkilatı nümayəndələri üçün 18 noyabr 2009-cu il tarixdə saat 10.00 ASK-nın (Həsən Əliyev küçəsi 57) konfrans zalında “Şirkətlərdə işçilərlə səmərəli iş aparılması” mövzusunda seminar keçirilməsini təşkil edir.

         Seminarı Almaniyadan gələn, əvvəllər “Mercedes“ Hamburq şirkətinin kadrlar şöbəsinin rəisi işləmiş cənab Şrehn aparacaq. Seminarda işçilərin stimullaşdırılması, əmək müqavilələri ilə necə işləmək, işçilərin işə yanaşması və digər məsələlər barədə mülahizələr aparılacaq.

Latviyanın paytaxtı Riqa şəhərində Beynəlxalq İşəgötürənlər Təşkilatının (BİT) Avropa Üzvlərinin İclası keçirilmişdir.

        Latviyanın paytaxtı Riqa şəhərində Beynəlxalq İşəgötürənlər Təşkilatının (BİT) Avropa Üzvlərinin İclası keçirilmişdir. Tədbirdə Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının Prezidenti Məmməd Musayev də iştirak etmişdir.

         Tədbir, Avropa ölkələrinin sahibkarlıq qurumlarının özəl sektora inamını bərpa etməyə və əmək bazarında fəallığı artırmağa yönəlmişdir. İclasda Avropanın 47 ölkəsinin işəgötürənlər təşkilatlarının rəhbərləri iştirak etmişdir.

         İclas qarşıdakı dövr üçün dünya əmək bazarında böhranla mübarizə aparmaq üçün cari siyasəti müəyyənləşdirmək, formalaşan sahibkarların rolunu gücləndirmək və strateji fəaliyyət planını hazırlamaq məqsədi ilə keçirilmişdir.

         İclasda Latviyanın əmək sahəsindəki cari durum və böhranla əlaqədar nəzərdə tutulan tədbirlər barədə, o cümlədən müxtəlif ölkələrin əmək bazarındakı hazırkı durum və böhranla əlaqədar nəzərdə tutulan tədbirlər barədə məlumat verilmişdir

         Beynəlxalq İşəgötürənlər Təşkilatının Baş Katibi cənab Antonio Penaloza beynəlxalq və regional tərəfdaşlarla işləməklə özəl sektora inamı bərpa edəcək və əmək bazarını canlandıra biləcək problemin siyasi həlli yolunu tapmaq istiqamətində göstərilən səylərdən söz açmışdır.

Yığıncaqda mühüm coğrafi-siyasi mövqedə yerləşən ölkəmizdə əlverişli biznes mühiti yaradılması sahəsində görülən işlər, iqtisadi böhran şəraitində belə Azərbaycanda ümumdaxili məhsul istehsalının artması barədə məlumat verilmişdir.