Son illər ölkəmizdə qadın sahibkarlığın inkişafına diqqət artır. Belə ki, qadınların işsizlik problemlərinin aradan qaldırılması məqsədilə onların sahibkarlıq fəaliyyətinə cəlb edilməsi respublika səviyyəsində prioritet kimi qəbul olunmuşdur.
     2008-2009-cu illər üçün Azərbaycan Hökuməti, Azərbaycan Həmkarlar İttifaqları Konfederasiyası və Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) arasında üçtərəfli qaydada bağlanmış Baş Kollektiv Sazişdə bu məsələyə aid xüsusi müddəa öz əksini tapmışdır. ASK sosial tərəfdaş  kimi bu məsələni daim diqqət mərkəzində saxlayır və mümkün resurslardan istifadə etməklə ölkədə qadın sahibkarlığın inkişafına çalışır.
       ASK  qadın sahibkarlığın inkişafı ilə bağlı fəaliyyətinə hələ 2003-cü ildən başlayıb. BƏT-in dəstəyi ilə “Azərbaycanda və Gürcüstanda işəgötürənlər təşkilatları vasitəsi ilə qadın sahibkarlığın inkişafı” layihəsi isə bu sahədə çox mühüm bir addım idi. Layihə respublikanın bir çox bölgələrini əhatə etməklə yanaşı, həm də Azərbaycanda qadın sahibkarlığın mövcud vəziyyəti, bu sahədə problemlər, qadın sahibkarlığa dəstək ola biləcək amillər və digər zəruri məsələlərin müəyyənləşdirilməsinə imkan yaratdı. Layihə çərçivəsində nəşr edilmiş «Qadın sahibkarlar» adlı kitab qadınların uğurlu biznes təcrübələrini nümayiş etdirir.
       ASK yanında qadın sahibkarlığın inkişafına yardım etmək və onların  sahibkarlıq sahəsində bilgilərinin artırılıması məqsədilə Daimi Komissiya və Treninq Mərkəzi yaradılmışdır.
     BƏT-nın “Bizneslə tanışlıq”, “Öz biznesinə başla və təkmiləşdir” proqramı çərçivəsində sahibkar qadınlar üçün treninqlər keçirilmişdir.
      Qeyd edək ki, ASK qadın sahibkarlığı sahəsində BƏT-lə əməkdaşlığını davam etdirir. Bu ildən etibarən  qadınların, xüsusilə gənc qadınların biznes fəaliyyətinə dəstək verilməsi məqsədli yeni bir layihə həyata keçirir.
        Qadın sahibkarlığına dəstək verilməsi sahəsində ASK öz sosial tərəfdaşları, xüsusilə Ailə, Qadın, Uşaq problemləri üzrə Dövlət Komitəsi ilə işgüzar əlaqələr yaratmış və bir sıra birgə tədbirlər keçirilmişdir.
     Azərbaycan hökuməti, qadın problemləri ilə məşğul olan yerli qeyri-hökumət təşkilatları, eləcə də beynəlxalq təşkilatlar qadınların sahibkarlıq fəaliyyətinin gücləndirilməsini diqqət mərkəzində saxlasa da bu sahədə müəyyən çətinliklər var.  Aparılan araşdırmalar göstərir ki,  bu çətinlik əsasən qadınların sahibkarlıq təşəbbüslərinin zəifliyi və bu fəaliyyətə başlamaq üçün lazımi bilik və vərdişlərinin olmamasıdır. Bunu nəzərə alaraq qadınlara sahibkarlıqla bağlı zəruri bilik və bacarıqların aşılanması üçün ASK öz fəaliyyətini davam etdirir. 
    Konfederasiya həmçinin ölkədə fəaliyyət göstərən xarici ölkə səfirliklər və beynəlxalq təşkilatlarla əməkdaşlıq çərçivəsində qadınların xarici ölkələrə səfərlərini, onların biznes forum, seminar və treninqlərdə iştirakını təmin edir.